เตนหิ ภนฺเต นาคเสน ตุมฺเห อตฺถิธมฺมํ นิพฺพานํ อปทิสฺสถ นตฺถิ นิพฺพานนฺติ ฯ
อตฺถิ มหาราช นิพฺพานํ มโนวิญฺเญยฺยํ มหาราช นิพฺพานํ วิสุทฺเธน มานเสน สนฺเตน
ปณีเตน อุชุเกน อนิวรเณน นิรามิเสน สมฺมาปฏิปนฺโน อริยสาโก นิพฺพานํ
ปสฺสตีติ ฯ กีทิสํ นาม ตํ ภนฺเต นาคเสน นิพฺพานํ ยนฺตํ อุปเมหิ อาทีปนียํ การเณหิ
มํ สญฺญาเปหิ ยถา ยถา อตฺถิธมฺมํ อุปเมหิ อาทีปนียนฺติ ฯ อตฺถิ มหาราช วาโต
นามาติ ฯ อตฺถิ ภนฺเตติ ฯ อิงฺฆ มหาราช วาตํ ทสฺเสหิ วณฺณโต วา สณฺฐานโต
วา อนุํ วา ถูลํ วา ทีฆํ วา รสฺสํ วาติ ฯ น สกฺกา ภนฺเต นาคเสน วาโต
อุปทสฺสิตุํ น โส วาโต หตฺถคหณํ วา นิมฺมทฺทนํ อุเปติ อปิจ อตฺถิ โส
วาโตติ ฯ ยทิ มหาราช น สกฺกา วาโต อุปทสฺสิตุํ เตนหิ นตฺถิ วาโตติ ฯ ชานามหํ
ภนฺเต นาคเสน วาโต อตฺถีติ เม หทเย อนุปวิฏฺฐํ น จาหํ สกฺโกมิ วาตํ
อุปทสฺสิตุนฺติ ฯ เอวเมว โข มหาราช อตฺถิ นิพฺพานํ น จ สกฺกา อุปทสฺสิตุํ
วณฺเณน วา สณฺฐาเนน วาติ ฯ สาธุ ภนฺเต นาคเสน สูปทสฺสิตํ โอปมฺมํ สุนิทฺทิฏฺฐํ
การณํ เอวเมตํ ตถา สมฺปฏิจฺฉามิ อตฺถิ นิพฺพานนฺติ ฯ

นิพฺพานสฺส อตฺถิภาวปญฺโห อฏฺฐโม ฯ

ภนฺเต นาคเสน กตเม เอตฺถ กมฺมชา กเตม เหตุชา กตเม อุตุชา กตเม
น กมฺมชา น เหตุชา น อุตุชาติ ฯ เย เกจิ มหาราช สตฺตา สเจตสา สพฺเพ
เต กมฺมชา อคฺคิ จ สพฺพานิ จ พีชชาตานิ เหตุชานิ ปฐวี จ ปพฺพตา จ อุทกญฺจ
วาโต จ สพฺเพ เต อุตุชา อากาโส จ นิพฺพานญฺจ อิเม เทฺว อกมฺมชา อเหตุชา
อนุตุชา ฯ นิพฺพานํ มหาราช น วตฺตพฺพํ กมฺมชนฺติ วา เหตุชนฺติ วา อุตุชนฺติ วา
อุปฺปนฺนนฺติ วา อนุปฺปนฺนนฺติ วา อุปฺปาทนียนฺติ วา อตีตนฺติ วา อนาคตนฺติ วา
ปจฺจุปฺปนฺนนฺติ วา จกฺขุวิญฺเญยฺยนฺติ วา โสตวิญฺเญยฺยนฺติ วา ฆานวิญฺเญยฺยนฺติ วา
ชิวฺหาวิญฺเญยฺยนฺติ วา กายวิญฺเญยฺยนฺติ วา อปิจ มหาราช มโนวิญฺเญยฺยํ ยํ โส สมฺมา
ปฏิปนฺโน อริยสาวโก วิสุทฺเธน ญาเณน ปสฺสตีติ ฯ รมฺมณีโย ภนฺเต นาคเสน ปญฺโห
สุวินิจฺฉิโต นิสฺสํสโย เอกนฺตคโต วิมติ อุปจฺฉินฺนา ตฺวํ คณิวรปรมาสชฺชาติ ฯ

กมฺมชากมฺมชปญฺโห นวโม ฯ

สตฺตโม วคฺโค ฯ